வலிந்து காணாமலாக்கப்பட்டோருக்கான நீதிப் போராட்டம்: சர்வதேச கவனம் பெற்ற மாநாடு

சர்வதேச வலிந்து காணாமலாக்கப்படல்களால் பாதிக்கப்பட்டோருக்கான தினத்தை முன்னிட்டு, ‘நீதிக்கான நீள் பயணம்’ என்ற தொனிப்பொருளில் சர்வதேச மாநாடு கடந்த ஆகஸ்ட் 30ஆம் திகதி யாழ்ப்பாணம் தந்தை செல்வா அரங்கில் நடைபெற்றது.

ஈழத்தமிழர்களின் நீண்டகால போராட்ட வரலாற்றில் முக்கியத்துவம் வாய்ந்ததாகக் கருதப்படும் இந்த மாநாடு, வலிந்து காணாமலாக்கப்பட்டோரின் உறவினர்களின் கோரிக்கைகளை சர்வதேச மட்டத்தில் எடுத்துச் சென்ற அதேவேளை, அதன் அரசியல் மற்றும் சமூக ரீதியான பல்வேறு அம்சங்கள் தொடர்பிலும் கவனம் செலுத்தப்பட்டுள்ளது.

வடக்கு, கிழக்கு பகுதிகளில் மாவட்ட ரீதியாக முன்னெடுக்கப்பட்டு வந்த வலிந்து காணாமலாக்கப்பட்டோரின் உறவினர்களின் போராட்டத்தை ஒரே தளத்தில் ஒருங்கிணைத்து, சர்வதேச மனித உரிமை அமைப்புகளின் நேரடிக் கவனத்துக்கு கொண்டு சென்றமை மாநாட்டின் முக்கியமான அம்சமாகக் குறிப்பிடப்படுகிறது.

ஐக்கிய நாடுகள் சபையின் வலிந்து காணாமலாக்கப்படல்கள் தொடர்பான பணிக்குழுவின் உறுப்பினர் அனா லொரெனா டெல்கடில்லோ பேரஸ் மற்றும் சர்வதேச மன்னிப்புச் சபையின் தெற்காசியப் பிராந்தியப் பணிப்பாளர் ஸ்மிருதி சிங் ஆகியோர் மாநாட்டில் நேரடியாகக் கலந்துகொண்டனர்.

வலிந்து காணாமலாக்கப்பட்டோர் தொடர்பில் உண்மையை வெளிப்படுத்துவதற்கும், பாதிக்கப்பட்ட மக்களுக்கு நீதி கிடைப்பதற்கும் சர்வதேச மட்டத்திலான நடவடிக்கைகள் அவசியம் என மாநாட்டில் வலியுறுத்தப்பட்டது.

உண்மையை அறியாமலேயே பலர் உயிரிழந்துள்ள நிலையில், இனிவரும் காலங்களில் எவரும் உண்மையை அறியாமல் உயிரிழக்கக் கூடாது என அனா லொரெனா டெல்கடில்லோ பேரஸ் வலியுறுத்தியிருந்தார்.

மேலும், அரச அதிகாரிகளிடம் போதிய ஆதாரங்கள் காணப்பட்டபோதும் குற்றங்களை மறுதலிப்பதை ஏற்றுக்கொள்ள முடியாது எனவும், செம்மணி உள்ளிட்ட மனிதப் புதைகுழிகள் தொடர்பில் சர்வதேச ஆதரவுடன் முறையான விசாரணைகள் முன்னெடுக்கப்பட வேண்டும் எனவும் வலியுறுத்தப்பட்டது.

எனினும், பாதிக்கப்பட்ட மக்களின் நீதிக்கான போராட்டத்தை முன்னிறுத்த வேண்டிய மாநாடு, தமிழ் அரசியல் கட்சிகளின் அரசியல் பிரசாரத்துக்கான தளமாக மாற்றப்பட்டதாகவும் விமர்சனங்கள் முன்வைக்கப்பட்டுள்ளன.

பல ஆண்டுகளாக நீதிக்காகப் போராடி வரும் காணாமலாக்கப்பட்டோரின் உறவினர்களின் கோரிக்கைகளுக்கு முன்னுரிமை வழங்கப்பட வேண்டிய நிலையில், அரசியல் கட்சிகளின் பிரதிநிதிகளுக்கு அதிக முக்கியத்துவம் வழங்கப்பட்டமை குறித்தும் அதிருப்தி வெளியிடப்பட்டுள்ளது.

அதேவேளை, மாநாட்டில் தமிழ் அரசியல் கட்சிகளின் பங்கேற்பு தொடர்பான அணுகுமுறைகளும் விமர்சனத்துக்குள்ளாகியுள்ளன. குறிப்பாக, மாநாட்டில் பங்கேற்பதற்கு உத்தியோகபூர்வ அழைப்பிதழ் அவசியம் என இலங்கைத் தமிழ் அரசுக் கட்சி தெரிவித்திருந்தமை தொடர்பிலும் பல்வேறு கருத்துக்கள் முன்வைக்கப்பட்டுள்ளன.

இதனிடையே, சர்வதேச வலிந்து காணாமலாக்கப்பட்டோர் தினத்தை முன்னிட்டு வடக்கு பகுதியில் நடைபெற்ற போராட்டங்கள் ஒரே தளத்தில் ஒருங்கிணைக்கப்படாமல் யாழ்ப்பாணம் மற்றும் கிளிநொச்சி என இரு இடங்களில் தனித்தனியாக முன்னெடுக்கப்பட்டமையும் கவனத்தை ஈர்த்துள்ளது.

யாழ்ப்பாணத்தில் சர்வதேச பிரதிநிதிகளின் பங்கேற்புடன் மாநாடு நடைபெற்ற அதேவேளை, கிளிநொச்சியில் லீலாதேவி ஆனந்தநடராஜாவின் ஒருங்கிணைப்பில் தனியான கவனயீர்ப்புப் போராட்டமும் நூல் வெளியீடும் இடம்பெற்றமை குறிப்பிடத்தக்கது.